اسپیکٹر جنرل پولیس سندھ غلام نبی میمن نے کراچی اور صوبے کے تمام اضلاع میں مختلف گاڑیوں کی غیرقانونی نمبر پلیٹس کے خلاف کریک ڈاؤن کا حکم دیا ہے۔
ترجمان کے مطابق اسپیکٹر جنرل پولیس سندھ غلام نبی میمن نے گاڑیوں پر غیر قانونی بلیو، گرین یا دیگر رنگوں کی نمبر پلیٹس اور پولیس لائٹس کے خلاف صوبائی سطح پر مہم شروع کرنے کا حکم دیا ہے۔
اسپیکٹر جنرل پولیس سندھ غلام نبی میمن نے اپنے ایک بیان میں کہا ہے کہ سندھ کی شاہراہوں اور ہائی ویز پر رواں دواں نجی ملکیت کی گاڑیوں پر نصب بلیو، گرین نمبر پلیٹس اور پولیس لائٹس کے خلاف سخت کارروائی عمل میں لائی جائے۔
آئی جی سندھ کا کہنا ہے کہ یہ عمل قانون سے تجاوز کے زمرے میں آتا ہے، پرائیوٹ گاڑیوں پر بلیو اور گرین نمبر پلیٹس کا استعمال سراسر غیرقانونی اور ماورائے قانون ہے۔
غلام نبی میمن کا کہنا ہے کہ اس قسم کے رجحان کے سدباب اور حوصلہ شکنی کے لیے ایف آئی آرز کے اندراج سمیت تمام تر ضروری قانونی کارروائی اشد ضروری ہے، تمام ڈی آئی جی ضلعی ایس ایس پیز اور ٹریفک پولیس غیر قانونی بلیو اور گرین نمبر پلیٹس اور پولیس لائٹس کے خلاف فی الفور ایک ٹھوس اور مربوط مہم کا آغاز کریں۔
حکم کے مطابق کارروائیوں پر مشتمل تفصیلات روزانہ کی بنیاد پر سینٹرل پولیس آفس کو ارسال کریں۔
غیر قانونی عمل میں ملوث یا مرتکب ٹھہرائے جانے والے پولیس افسران و اہلکاروں کے خلاف تادیبی کارروائی کو بھی یقینی بنایا جائے۔
ترجمان کے مطابق مذکورہ مہم اگلے تین ماہ تک جاری رہے گی۔
