کراچی میں 5 سال سے قید 20 بھارتی ماہی گیروں کو حکومتِ پاکستان نے جذبہ خیر سگالی کے تحت لانڈھی جیل سے رہا کر کے لاہور روانہ کر دیا، رہا کئے گئے ماہی گیروں کو کل واہگہ بارڈر پر بھارتی حکام کے حوالے کیا جائے گا۔
کراچی لانڈھی جیل میں 20 بھارتی ماہی گیروں کو کورٹ پولیس اور ایدھی فاؤنڈیشن کی انتظامیہ کے حوالے کیا گیا۔
ایدھی فاؤنڈیشن کے سربراہ فیصل ایدھی کے مطابق 20 ماہی گیروں کو لاہور کے واہگہ بارڈر تک پہنچانے کے تمام سفری اخراجات ایدھی فاؤنڈیشن ادا کر رہی ہے، ماہی گیروں کو خصوصی بس کے ذریعے لاہور روانہ کیا گیا ۔
جیل پولیس کی ٹیم بھی بس میں ماہی گیروں کے ساتھ جائے گی جو دیگر انتظامات کرے گی، ماہی گیروں کے سفری اخراجات کے علاوہ انہیں اخراجات کیلئے رقم اور کچھ تحائف بھی دیئے گئے۔
ذرائع کے مطابق ماہی گیروں کو جون 2018ء میں پاکستانی سمندری حدود میں غیر قانونی طورپر داخل ہونے اور بلا اجازت ماہی گیری کے الزام میں گرفتار کیا گیا تھا۔
