وزیر اعلیٰ پنجاب چودھری پرویز الٰہی نے صوبے میں احساس پروگرام کا دائرہ کار بڑھانے کا فیصلہ کیا ہے۔
تفصیلات کے مطابق وزیراعلیٰ پنجاب اور سابق وفاقی وزیر مونس الٰہی سے پنجاب احساس پروگرام کی چیئرپرسن ڈاکٹر ثانیہ نشتر کی ملاقات ہوئی جس میں چودھری پرویز الٰہی نے احساس راشن رعایت پروگرام کے تحت فی خاندان ماہانہ سبسڈی میں اضافے کی منظوری دے دی۔
ڈاکٹر ثانیہ نشتر نے پنجاب احساس پروگرام کے تحت مختلف ویلفیئر پراجیکٹس پر ہونے والی پیشرفت کے بارے میں وزیر اعلیٰ کو بریفنگ دی۔
چودھری پرویز الٰہی کا اس موقعے پر کہنا تھا کہ احساس راشن رعایت پروگرام کے تحت مستحق خاندان آٹا، گھی اور دالیں مارکیٹ سے 40 فیصد سستی خرید سکیں گے۔
وزیراعلیٰ نے محکمہ سوشل ویلفیئر کے زیر انتظام چلنے والے فلاحی اداروں میں رہائش پذیر بچوں اور بزرگوں کیلئے کھانے کی فی کس رقم دوگنا کرنے کی منظوری دیتے ہوئے کہا کہ مہنگائی اور کھانے کے معیار و مقدار کو بہتر بنانے کیلئے فلاحی اداروں میں رہائش پذیر افراد کیلئے کھانے کی فی کس رقم میں اضافہ کیا ہے، کھانے کی فی کس رقم میں اضافے سے ایسے افراد کو معیاری اور وافر کھانا مل سکے گا۔
ان کا کہنا تھا کہ احساس بل پنجاب اسمبلی میں جلد پیش کیا جائے گا۔
انہوں نے جنوبی پنجاب کے سیلاب متاثرہ علاقوں کے عوام کا معیار زندگی بلند کرنے کے لئے فلاحی منصوبے متعارف کرانے کا فیصلہ کرتے ہوئے کہا کہ پنجاب احساس پروگرام کے تحت جنوبی پنجاب میں خواتین کیلئے ویلفیئر پراجیکٹس شروع کیے جائیں گے۔
چودھری پرویزالٰہی نے کہا کہ اسپیشل سرکاری ملازمین کے لیے ہاؤسنگ الاٹمنٹ پالیسی کے تحت 5 فیصد ہارڈ شپ کوٹہ مختص کیا جائے گا، اسپیشل افراد کے لئے پنجاب گورنمنٹ سرونٹ ہاؤسنگ فاؤنڈیشن میں کوٹہ متعارف کرایا جائے گا، ہاؤسنگ سوسائٹیز میں اسپیشل افراد کو سبسڈی دینے کے لئے 50 کروڑ روپے مختص کیے جائیں گے۔
چیئرمین منصوبہ بندی و ترقیات، سیکرٹری خزانہ اور متعلقہ حکام بھی اس موقعے پر موجود تھے۔
