پی ٹی آئی کی کامیابی پر پاکستانی اداکاروں کا ردعمل

پنجاب کے ضمنی انتخابات میں پاکستان تحریکِ انصاف کی کامیابی پر پاکستان شوبز انڈسٹری کے متعدد اداکاروں نے خوشی کا اظہار کیا ہے۔

شوبز انڈسٹری کے زیادہ تر ستارے عمران خان کی حمایت میں سوشل میڈیا پر پیغامات جاری کرتے رہتے ہیں تاہم اب بڑی تعداد میں اداکاروں نے انسٹاگرام اور ٹوئٹر پر پی ٹی آئی کی جیت کا جشن منایا۔

سینئر اداکارہ شگفتہ اعجاز نے عمران خان کی فتح پر ان کی تصاویر انسٹاگرام اسٹوری پر شیئر کیں۔

ساتھ ہی اداکارہ نے عمران خان کی جیت کو سراہا اور تالیاں بجانے والے ایموجی کا استعمال کیا۔

سینئر اداکارہ و میزبان ثمینہ پیرزادہ نے گزشتہ روز انتخابات کے دوران کئی پیغامات شیئر کیے اور لوگوں کا حوصلہ بڑھایا۔

پاکستان تحریک انصاف کی جیت پر سینئر اداکارہ نے اللہ کا شکر ادا کیا اور ٹوئٹ کی۔

اداکار و میزبان فیصل قریشی نے پی ٹی آئی کی جیت پر عمران خان کی ماضی کی تصویر شیئر کی جس میں وہ بولنگ کرتے نظر آ رہے ہیں۔

ساتھ ہی انہوں نے ٹوئٹر پیغام میں پی ٹی آئی کا ہیش ٹیگ استعمال کرتے ہوئے لکھا کہ ‘یہ عوام کا فیصلہ تھا’۔

اداکار رضا تالش نے مسلم لیگ ن کی نائب صدر مریم نواز کی ویڈیو انسٹاگرام اسٹوری پر شیئر کی، ساتھ ہی ویڈیو پر ‘فلٹر’ لگایا گیا تھا جس میں ایسا لگ رہا تھا کہ مریم نواز آبدیدہ ہیں۔

اداکار نے اسٹوری میں لکھا کہ ‘نو اِشو، لے لو ٹشو’۔

اداکار عمیر رانا نے ضمنی انتخابات کے دوران انسٹاگرام اسٹوری شیئر کی اور سوشل میڈیا صارفین سے درخواست کی تھی کہ برائے مہربانی جائیں اور بلے پر ٹھپہ لگا کر پی ٹی آئی کو جتوائیں۔

اداکارہ ازیکا ڈینیئل نے پی ٹی آئی کی جیت پر لکھا کہ ‘آج یہ قوم جاگ اٹھی ہے، آپ سب کو مبارکباد، کیا کلین سوئپ کیا ہے’۔

ہارون شاہد نے لکھا کہ ایک مرتبہ پھر عوام نے عمران خان کو منتخب کیا ہے، یہ تو بس 2022 کے عام انتخابات کے لیے وارم اپ تھا۔

اپنی ایک ٹوئٹ میں ہارون شاہد نے پیپلز پارٹی کے بلاول بھٹو زرداری کے لیے لکھا کہ ‘نئے پاکستان میں آپ کو خوش آمدید’۔

Load/Hide Comments

اپنا تبصرہ بھیجیں