پاکستان کے لیے سب سے زیادہ گینز ورلڈ ریکارڈ بنانے والے راشد نسیم نے مارشل آرٹس کیٹیگری میں مزید دو ریکارڈز اپنے نام کرلیے ہیں۔
راشد نسیم نے بھارت اور چائنہ کے ریکارڈ توڑے ہیں جبکہ انہوں نے نن چکو کیٹیگری میں چائنیز کنگفو ماسٹر کو ایک مرتبہ پھر شکست دے دی ہے۔
علاوہ ازیں راشد نسیم نے انڈین ماشل آرٹس ماسٹر کے سر کے ساتھ بوتل کھولنے کے ریکارڈ کو بھی توڑ ڈالا ہے۔
اس طرح مارشل آرٹس ماسٹر کے ریکارڈز کی تعداد 77 ہو گئی ہے جبکہ ان کی اکیڈمی اب تک 96 ریکارڈ اپنے نام کرچکی ہے۔
راشد نسیم اب تک نن چکو کی مختلف کیٹیگری میں دنیا میں سب سے زیادہ ریکارڈ بنانے کا اعزاچ اپنے پاس رکھتے ہیں اور یہ نن چکو میں ان کا 9 واں گینز ورلڈ ریکارڈ ہے۔
گنیز ورلڈ ریکارڈ نے ای میل کے ذریعے تصدیق کی ہے جبکہ اس حوالے سے تفصیلات بھی اپنی ویب سائٹ پر بھی جاری کردی ہیں۔
دنیا میں سب سے زیادہ مارشل آرٹس عالمی ریکارڈ بنانے والے راشد نسیم نے پاکستان کے مشہور کوہ پیما محمد علی سدپارہ کوخراج تحسین پیش کرنے کے لیے بھی ریکارڈ بنایا تھا۔
یہ ریکارڈ انہوں نے چائنہ کے کنگفو ماسٹر زی ڈٰی شنگ کے پاس پہلے سے موجود ریکارڈ کو توڑا تھا، زی ڈٰی شنگ نے ایک منٹ میں بوتل کے درمیان میں رکھے 19 تاش کے پتوں کو نن چکوکی مدد سے بوتل کو گرائے بغیر نکالا تھا۔
جبکہ راشد نسیم نے بہترین کارکردگی کا مظاہرہ کرتے ہوئے 22 مرتبہ یہ کارنامہ انجام دیا اور دوسرے ریکارڈ میں راشد نسیم نے سر کے ساتھ ایک منٹ میں 71 بوتل کھول ڈالیں تھی۔
اس سے پہلے یہ ریکارڈ انڈیا کے پرابھاکر ریڈی کے پاس تھا جنہوں نے ایک منٹ میں سر سے 68 بوتلیں کھولیں تھیں۔
راشد نسیم اپنے 100 ریکارڈ مکمل کرنا چاہتے ہیں اور یہاں یہ بات بھی قابل ذکر ہے کہ راشد نسیم کو اب تک حکومتی سرپرستی حاصل نہیں ہے یہ تمام ریکارڈ انہوں نے اپنی مدد آپ کے تحت ہی بنائے ہیں۔
