چیئرمین جوائنٹ چیفس آف اسٹاف کمیٹی جنرل ندیم رضا نے کہا ہے کہ پاک عمان تعاون خطے میں امن و سلامتی پر مثبت اثرات مرتب کرے گا۔
پاک فوج کے شعبہ تعلقات عامہ ( آئی ایس پی آر ) کے مطابق چیئرمین جوائنٹ چیفس آف اسٹاف کمیٹی جنرل ندیم رضا سے عمان کی بحریہ کے سربراہ ایڈمرل سیف ناصر محسن الرہبی نے ملاقات کی جس میں سیکیورٹی و خطے کے ایشوز سمیت مختلف شعبوں میں تعاون سے متعلق امور پر بات چیت کی گئی۔
آئی ایس پی آر کا کہنا ہے کہ جنرل ندیم رضا نے دفاع و سیکیورٹی تعاون بڑھانے کی ضرورت پر زور دیا۔
چیئرمین جوائنٹ چیفس آف اسٹاف کمیٹی جنرل ندیم رضا نے کہا ہے کہ پاک عمان تعاون خطے میں امن و سلامتی پر مثبت اثرات مرتب کرے گا ، افغانستان میں طویل مدتی امن و استحکام کو یقینی بنانے کے لیے تمام علاقائی ممالک کو مل کر کام کرنے کی ضرورت ہے۔
ترجمان پاک فوج کا کہنا ہے کہ معزز مہمان نے عمان کی مسلح افواج کی استعداد کار بڑھانے میں پاکستان کی مسلح افواج کے کردار کو سراہا اور دہشت گردی کے خلاف جنگ میں پاکستان کی قربانیوں کا بھی اعتراف کیا گیا۔
