کراچی: شہر قائد میں بورڈ آفس کے قریب دھماکہ ہوا ہے جس کے نتیجے میں دو افراد جاں بحق اور چار زخمی ہو گئے ہیں۔
نجی ٹی وی ہم نیوز کے مطابق دھماکہ بورڈ آفس کے ساتھ واقع پیٹرول پمپ کے قریب سنا گیا ہے۔ ابتدائی معلومات کے تحت دھماکے کی اطلاع ملتے ہی رینجرز، پولیس، فائر بریگیڈ اور امدادی اداروں کے رضاکاروں کی بڑی تعداد جائے وقوع پر پہنچ گئی ہے۔
جائے وقوع سے زخمیوں کو فوری طور پر اسپتال منتقل کیا جا رہا ہے جب کہ ثبوت و شواہد بھی اکھٹے کیے جا رہے ہیں۔
ڈی آئی جی ناصر آفتاب کا کہنا ہے کہ دھماکے کی نوعیت کا جائزہ لیا جا رہا ہے۔ انہوں نے کہا کہ دھماکے کے نتیجے میں دو افراد کے جاں بحق اور چار کے زخمی ہونے کی اطلاعات ہیں۔
