اسٹیٹ بینک کی جانب سے ’آسان موبائل اکاؤنٹ‘ اسکیم کا آغاز کیا جارہا ہے جس کے تحت اب صارفین گھر بیٹھے ناصرف بینک اکاؤنٹ کھول سکیں گے بلکہ آپریٹ بھی کریں گے۔
اسٹیٹ بینک آف پاکستان کے جاری اعلامیے کے مطابق 13 دسمبر سے ’’آسان موبائل اکاؤنٹ‘‘ کے نام سے نئی سہولت شروع کی جارہی ہے۔ اس کا مقصد برانچ لیس بینکنگ میں ریموٹ اکاؤنٹ میں مزید آسانی پیدا کرنا ہے۔
اسکیم کے تحت صارفین بینکوں میں جائے بغیر ہی ناصرف اپنے اکاؤنٹ کھول سکیں گے بلکہ انہیں آپریٹ بھی کریں گے۔
آسان موبائل اکاؤنٹ انٹر نیٹ تک رسائی نہ رکھنے والے کم آمدنی والے طبقات کے لیے اہم کردار ادا کرے گا۔ آسان موبائل اکاؤنٹ خواتین صارفین کو میدان میں لانے کے لیے بھی ایک بہترین طریقہ ہے۔
مرکزی بینک کا کہنا ہے کہ ’آسان موبائل اکاؤنٹ‘ کے لیے برانچ لیس بینکنگ پرووائیڈرز اور سیلولر فون آپریٹرز ایک انٹرآپریبل پلیٹ فارم مہیا کرنے کے لیے مل کر کام کررہے ہیں۔ یہ طریقہ کار اسٹیٹ بینک، پی ٹی اے نادرا اور برانچ لیس بینکنگ کے 13 پرووائیڈرز، تمام سیلولر فون آپریٹرز (سی ایم اوز) اور ورچوئل ریمی ٹنس گیٹ وے (وی آر جی) کے اشتراک سے تیار کیا گیا ہے۔
