پاکستانی معروف، منجھی ہوئی اداکارہ صبا قمر اپنی فلم ’کملی‘ کے پریمیئر پر داد ملنے پر جذباتی ہو گئیں اور اپنے آنسوؤں پر قابو نہ رکھ سکیں۔
سوشل میڈیا پوسٹس اور اپنے وی لاگز میں ’دھاکڑ‘ (مضبوط) نظر آنے والی اداکارہ صبا قمر خود کو سراہے جانے پر رو پڑیں۔
گزشتہ دنوں صبا قمر کی فلم ’کملی‘ کے پریمیئر شو میں معروف فنکاروں نے شرکت کی، فلم کے پریمیئر کے اختتام پر نامور فنکاروں کی جانب سے داد ملنے پر صبا قمر رو پڑیں۔
اس حساس لمحے کی متعدد ویڈیوز سوشل میڈیا پر وائرل ہو گئی ہیں۔
ویڈیوز میں دیکھا جا سکتا ہے کہ پریمیئر کے اختتام پر مہوش حیات صبا قمر کو گلے لگا رہی ہیں اور باقی فنکار صبا قمر کے اعزاز میں کھڑے ہو کر تالیاں بجا رہے ہیں۔
اس دوران ہدایتکار سرمد کھوسٹ کو بھی صبا قمر کو چُپ کرواتے ہوئے اور گلے لگا کر دلاسہ دیتے ہوئے دیکھا جا سکتا ہے۔
واضح رہے کہ اداکارہ صبا قمر کی فلم ’ گھبرانا نہیں ہے‘ کہ بعد فلم ’کملی‘ 3 جون کو سینما گھروں کی زینت بنے گی۔
فلم ’کملی‘ کی کاسٹ میں صبا قمر، ثانیہ سعید، عمیر رانا، عدیل افضل اور نمرہ بُچہ سمیت دیگر اداکار شامل ہیں۔
