پاکستان جونئیر لیگ : بہاولپور رائلز اورگوادر شارکس نے فائنل میں‌جگہ پکی کر لی

لاہور: پاکستان جونیئر لیگ کا فائنل کل بہاولپور رائلز اور گوادر شارکس کے درمیان کھیلا جائے گا۔

پاکستان جونیئر لیگ (پی جے ایل) کا دوسرا کوالیفائر میچ آج لاہور کے قذافی اسٹیڈیم میں بہاولپور رائلز اور مردان واریئرز کے درمیان کھیلا گیا۔

اس میچ میں بہاولپور رائلز نے 9 وکٹوں سے کامیابی حاصل کرکے فائنل تک رسائی حاصل کرلی ہے جس میں ان کا مقابلہ گوادر شارکس سے کل کھیلا جائے گا۔

فائنل میچ سے قبل اختتامی تقریب منعقد کی جائے گی جس میں نامور فنکار اپنے فن کا مظاہرہ کریں گے جب کہ میچ مقامی وقت کے مطابق شام ساڑھے 7 بجے شروع ہوگا۔

واضح رہے کہ دوسرے کوالیفائر میچ میں مردان واریئرز نے پہلے بیٹنگ کرتے ہوئے مقررہ اوورز میں 9 وکٹوں کے نقصان پر 132 رنز اسکور کیے تھے۔

مردان واریئرز کی جانب سے شاہ زیب خان نے سب سے زیادہ 32 رنز اسکور کیے جب کہ محمد فاروق 24 اور داؤد نذر نے 23 رنز بنائے جب کہ بہاولپور رائلز کی جانب سے ارحم نواب، عبید شاہد اور ذیشان نے 2،2 کھلاڑیوں کو آؤٹ کیا۔

ہدف کے تعاقب میں بہاولپور رائلز نے باسط علی اور طیب عارف کی جاندار بیٹنگ کی بدولت ہدف 15 ویں اوور میں پورا کرلیا جب کہ باسط علی نے 91 رنز کی ناقابل شکست اننگز کھیلی اور طیب عارف 32 رنز بناکر ناٹ آؤٹ رہے۔

یاد رہے کہ گوادر شارکس پہلے کوالیفائر میچ میں بہاولپور رائلز کو شکست دے کر فائنل میں پہنچا تھا۔

Load/Hide Comments

اپنا تبصرہ بھیجیں