کراچی: پاکستان اور آسٹریلیا کے درمیان ہونے والے دوسرے ٹیسٹ میچ کے لیے جامع سیکیورٹی پلان مرتب کرلیا گیا ہے۔
پاکستان اور آسٹریلیا کی کرکٹ ٹیموں کے درمیان دوسرا ٹیسٹ میچ کراچی میں ہونا ہے جس کے حوالے سے سیکیورٹی ڈویژن نے جامع سیکیورٹی پلان مرتب کیا ہے۔
سیکیورٹی پلان ڈی آئی جی سیکیورٹی اینڈ ایمرجنسی سروسز ڈویژن ڈاکٹرمقصود احمد کی صدارت میں ہونے والے اجلاس میں مرتب کیا گیا ہے۔
اجلاس میں کمانڈنٹ ایس ایس یو ذیشان شفیق صدیقی، ایڈیشنل ڈپٹی کمشنر ساوٗتھ تبریز مری، ونگ کمانڈر سندھ رینجرز ظفر، لیفٹیننٹ کرنل مصور عباس، پاک آرمی کے کرنل شکر زئی نے شرکت کی۔
علاوہ ازیں اجلاس میں ایس ایس پی ایسٹ قمر رضا جسکانی، رینجرز اور پی سی بی کے حکام سمیت تمام اسٹیک ہولڈرز نے بھی شرکت کی۔
مجموعی طورپر 5276 پولیس اہلکارسیکیورٹی پر مامور ہوں گے جس میں سے ایس ایس یو کے 1148 کمانڈوز سمیت سیکیورٹی ڈویژن کے1667 اہلکار اپنے فرائض انجام دیں گے۔
ٹریفک پولیس کے 1398، اسپیشل برانچ کے 430، ریپڈ رسپانس فورس کے 375 اہلکار تعینات کیے جائیں گے۔
پاک فوج و سندھ رینجرزکے جوان اوردیگر قانون نافذ کرنے والے اداروں کے اہلکار بھی اپنے فرائض انجام دیں گے۔
اہلکارنیشنل اسٹیڈیم، کراچی ایئرپورٹ، روٹس، پریکٹس گراؤنڈز، پارکنگز، ہوٹلز اور دیگر مختلف مقامات پر تعینات ہوں گے جبکہ ماہر نشانہ باز بھی اہم تنصیبات پر تعینات کیے جائیں گے۔
ایس ایس یو کی خصوصی کمانڈ اینڈکنٹرول بس اسٹیڈیم کے اطراف کی نگرانی کے لیے نیشنل اسٹیڈیم پرتعینات کی جائے گی جبکہ ٹیموں کی نقل وحرکت کے دوران فضائی نگرانی بھی کی جائے گی۔
اسپیشل ویپن اینڈ ٹیکٹکس (ایس ڈبلیو اینڈ ٹی) کی ٹیم کسی بھی ہنگامی صورتحال سے نمٹنے کے لیے اسٹیڈیم کے اطراف گشت پر مامور ہوگی۔
عوام کی سہولت کو مدنظر رکھتے ہوئے سر شاہ سلیمان روڈ کے ایک ٹریک کے علاوہ تمام سڑکیں ٹریفک کے لیے کھلی رہیں گی۔
تماشائیوں کو شٹل بس سروس کے ذریعے پارکنگ پوائنٹس سے اسٹیڈیم تک لایا جائے گا اور تماشائیوں کی سہولت کے لیے ٹریک سوٹ میں ملبوس ایس ایس یو کمانڈو پارکنگ پوائنٹس سے انکلوژرتک ان کی رہنمائی کریں گے۔
اسٹیڈیم کے احاطے میں سی این جی سلینڈر نصب گاڑیوں کے داخلے اور ڈرون کیمروں کے استعمال پر سخت پابندی ہوگی۔
نیشنل اسٹیڈیم آنے والے شائقین کے لیے حکیم سعید گراؤنڈ نزد بیت المکرم مسجد یونیورسٹی روڈ پر پارکنگ پوائنٹ مختص جائے گا۔
نیشنل کوچنگ سینٹر سے ملحقہ چائنا گراؤنڈ وی آئی پیز کی پارکنگ کے لیے مختص کیا جائے گا۔
شائقین کے لئے خصوصی ہدایات
تماشائیوں کو اپنی شناخت ثابت کرنے کے لیے قومی شناختی کارڈاپنے ہمراہ لازمی رکھنا ہے۔
لمبی قطاروں میں انتظار سے بچنے کے لیے اسٹیڈیم میں وقت سے پہلے پہنچیں۔
اسٹیڈیم میں داخلے سے پہلے شائقین کو ویکسی نیشن سرٹیفکیٹ پیش کرنا ہو گا۔
اسٹیڈیم میں داخلے کے وقت ماسک پہننا لازمی ہوگا۔
آتشی اسلحہ، کھلونا بندوقیں، دھماکہ خیز مواد، پٹاخے، سگریٹ، ماچس، لائٹر، چاقو اور دھات اسٹیڈیم کے اندر لے جانے کی اجازت نہیں ہوگی۔
کسی بھی بینر، پوسٹریا پلے کارڈ جس پر مذہب یا نسل کی بنیاد پر امتیازی سلوک یا فحش باتیں درج ہوں کی سختی سے ممانعت ہوگی۔
تماشائیوں کوگراؤنڈ، کھلاڑیوں اور ساتھی تماشائیوں پرکسی قسم کی چیز پھینکنے کی بھیاجازت نہیں ہوگی۔
