ملک بھر میں جاری سیاسی کشیدگی کے باعث ویسٹ انڈیز کے خلاف ہوم سیریز پر بھی خدشات کے بادل منڈلانے لگے ہیں۔
خبر رساں ادارے کی رپورٹ کے مطابق ویسٹ انڈیز کے خلاف ہوم ون ڈے سیریز پر بھی ملک بھر میں جاری سیاسی کشیدگی کے اثرات پڑنے کا خطرہ ہے۔
رپورٹ کے مطابق بین الاقوامی میچز سے قبل لاجسٹک امور مکمل کرنے کے لیے وینیو کا بروقت فیصلہ ضروری ہوگیا ہے کیونکہ تاخیر ہونے سے انتظامی مشکلات مزید بڑھ جائیں گی۔
لانگ مارچ کی وجہ سے پیدا ہونے والی کشیدہ صورت حال کے باعث گذشتہ روز ہی کنڈیشنگ کیمپ کا پہلا مرحلہ ختم کردیا گیا ہے جو کہ 25 مئی تک جاری رہنا تھا۔
دوسری جانب 26 مئی سے 10 جون تک ہونے والے دوسرے کنڈیشنگ کیمپ کو بھی غیر معینہ مدت تک کے لیے ملتوی کردیا گیا ہے جبکہ سدرن پنجاب اور ناردرن پنجاب کی سٹی کرکٹ ایسوسی ایشنز کے ٹرائلز بھی ملتوی کردیے گئے ہیں۔
سندھ سٹی کرکٹ ایسوسی ایشنز کے ٹرائلز کا شیڈول بھی تبدیل کیا جارہا ہے جبکہ کنڈیشنگ کیمپ اور ٹرائلز کی نئی تاریخوں کا اعلان بعد میں کیا جائے گا۔
تاہم اس تمام صورت حال کے بعد بھی پاکستان کرکٹ بورڈ ویسٹ انڈیز کے خلاف ہوم سیریز کروانے کے لیے پر امید دکھائی دے رہا ہے۔
نجی خبر رساں ادارے سے گفتگو کرتے ہوئے پی سی بی کے ڈائریکٹر میڈیا سمیع الحسن برنی کا کہنا تھا کہ التوا کی کوئی تجویز زیر غور نہیں، پہلی ترجیح اب بھی راولپنڈی ہی ہے جبکہ ملتان کو بیک اپ کے طور ہر رکھا گیا ہے۔
انہوں نے کہا کہ فیصلوں کے لیے وقت کم ضرور ہے لیکن جون سے پاکستان ٹیم کا کیمپ لگے گا اور 5 جون کو ویسٹ انڈیز کی ٹیم پاکستان پہنچے گی۔
