ایشیا کپ میں افغانستان کے خلاف 2چھکے لگا کر میچ پاکستان کے نام کرنے والے نسیم شاہ نے اپنا بیٹ شاہد آفریدی فاؤنڈیشن کو دے دیا۔
نسیم شاہ کے بیٹ کی نیلامی سے حاصل ہونے والی رقم لوئر دیر اور سوات کے سیلاب متاثرین پر خرچ ہوگی۔
واضح رہے کہ ایشیا کپ میں افغانستان کے خلاف جس بیٹ سے نسیم شاہ نے کھیل کے آخری لمحات میں 2 چھکے لگائے، وہ بیٹ محمد حسنین کا تھا۔
افغانستان کے خلاف میچ کے دوران نسیم شاہ نے حسنین سے وہ بیٹ کھیلنے کے لیے لیا اور پھر تاریخ رقم کردی۔
محمد حسنین نے اپنا بیٹ نسیم شاہ کو گفٹ کردیا تھا اور نسیم شاہ نے یادگار بیٹ نیلامی کے لیے پیش کردیا تھا۔
کھیل ختم ہونے کے بعد نسیم شاہ نے اپنے انٹرویو میں کہا تھا کہ آخری اوور میں جب وہ بیٹنگ کررہے تھے تو انہیں یقین تھا کہ وہ چھکے مار سکتے ہیں، کیونکہ وہ اس کے لئے نیٹ پر پریکٹس بھی کرتے ہیں۔
نسیم شاہ نے کہا تھا کہ آخری اوور میں انہوں نے حسنین سے بلا تبدیل کیا اور پھر یہ میچ ان کے کیرئیر کا یادگار میچ بن گیا۔
