عمران خان کے جانے پرجمائما خان اور بھائیوں کا ردعمل

تحریک عدم اعتماد کی کامیابی سے وزرات عظمیِ کا منصب کھونے والے عمران خان کی سابقہ اہلیہ جمائما خان بھی پاکستان کے حالات پربخوبی نظررکھے ہوئے ہیں۔

سوشل میڈیا کے ذریعے پاکستان سے اپنا تعلق جوڑے رکھنے والی جمائما نے بھی پاکستان کے موجودہ سیاسی حالات اورعمران خان کے گھرجانے پربراہ راست نہ سہی لیکن اپنا ردعمل دیا ہے۔

لندن میں ایون فیلڈ کے سامنے ن لیگ کے کارکنان کے احتجاج کی ایک ویڈیو سے متعلق ٹویٹ پرجمائما کا تبصرہ واضح کرتا ہے کہ وہ اس خبرسے ہرگزخوش نہیں ہیں۔

یہ ویڈیو بلوچستان سے تعلق رکھنے والے سابق ایم پی اے اور ن لیگ بلوچستان کے سابقہ سیکرٹری اطلاعات سنتوش کماربگٹی کے ٹوئٹرہینڈل سے شیئرکی گئی تھی جس کے کیپشن میں انہوں نے عمران خان کے بیٹوں کے نام لکھتے ہوئے کہا کہ ایون فیلڈ کے سامنے ہجوم قاسم کا باپ چورہے، سلیمان کا باپ چورہے، ٹیرین کا باپ چور ہے کہ نعرے لگارہے ہیں۔

سنتوش کمارنے ساتھ ہی واضح کیا کہ ٹیرین عمران خان کی وہ بیٹی ہے جسے انہوں نے نیویارک کی عدالت کے حکم کے باوجود نہیں اپنایا۔

اس ٹویٹ میں عمران خان اورمریم نوازکے علاوہ جمائما کو بھی ٹیگ کیا گیا جنہوں نے ہیش ٹیگ کے ساتھ تبصرے میں لکھا ‘ پُرانا پاکستان’.

جمائما کی جانب سے اس جواب پرسنتوش کمارنے انہیں پُرانے پاکستان میں خوش آمدید کہتے ہوئے لکھا، ‘ہاں ، آخرکار پُرانا پاکستان، اللہ کا شکرہے لیکن نئے پاکستان کا باقی ماندہ گندصاف کرنے میں کچھ وقت لگے گا۔ امید ہے کہ پاکستان میں قانون اپنا راستہ اختیار کرے گا اور فاشسٹ عمران کوآرٹیکل 6 کے تحت پکڑاجائے گا’۔

اس سے قبل جمائما کے بھائی بین گولڈ اسمتھ نے بھی عمران خان کی تعریف کرتے ہوئے انہیں پاکستان سے مخلص قراردیا تھا۔

جمائما کے دوسرے بھائی اور برطانوی وزیر زیک گولڈ اسمتھ نے بھی اپنی ٹویٹ میں عمران خان کوسراہتے ہوئے انہیں عالمی سطح پرسب سے کم کرپٹ سیاستدانوں میں سے ایک کہا اور ساتھ ہی اس یقین کا بھی اظہارکیا کہ عمران خان آئندہ انتخابات میں بھاری اکثریت سے کامیاب ہوں گے۔

سال 1995 میں شادی کے بندھن میں بندھنے والے عمران خان اورجمائما گولڈ اسمتھ کی راہیں 2004 میں جدا ہو گئی تھیں لیکن طلاق کے بعد بھی جمائما نے اپنے نام کے ساتھ لفظ خان جوڑے رکھا اورشاید دلی وابستگی کے باعث ہی وہ ہر مشکل وقت میں عمران خان کا ساتھ دیتی آئی ہیں جس کا ایک ثبوت سپریم کورٹ میں عمران خان کیخلاف نااہلی کیس میں منی ٹریل سے متعلق رسیدیں بھجوانا بھی ہے۔

بھائیوں کی جانب سے کی جانب سے کی جانے والی ٹویٹس ثابت کرتی ہیں کہ صرف جمائماہی نہیں، رشتہ ٹوٹنے کے باوجود ان کا خاندان بھی عمران خان کیلئے نیک خواہشات رکھتا ہے.

Load/Hide Comments

اپنا تبصرہ بھیجیں