اسٹیٹ بینک آف پاکستان نے 100,50,10اور 1000 روپے مالیت کے پرانے ڈیزائن کے نوٹ تبدیل کرانے کی تاریخ میں توسیع کردی ہے۔
اسٹیٹ بینک آف پاکستان نے جاری بیان میں کہا ہے کہ ملک بھر میں اچھے معیار کے کرنسی نوٹوں کی مناسب فراہمی کو یقینی بنانا اسٹیٹ بینک کے اہم اسٹریٹجک اہداف میں شامل ہے۔
اسٹیٹ بینک مارکیٹ سے گندے اور ناکارہ نوٹوں کو اکٹھا کرتا ہے اور ان کی جگہ نئے نوٹ لے لیتا ہے۔ دیگر مرکزی بینکوں کی طرح اسٹیٹ بینک آف پاکستان بھی وقتاً فوقتاً نئے کرنسی نوٹ جاری کرتا اور وفاقی حکومت کی منظوری سے پرانی سیریز کو ختم کرتا ہے۔
بیان میں کہا گیا ہے کہ وفاقی کابینہ نے اسٹیٹ بینک ایکٹ آف پاکستان ایکٹ 1956 کے سیکشن 25(2) کے تحت بینک کے بورڈ کی سفارشات پر بینک نوٹوں کو ختم کرنے کی منظوری دی ہے۔
نئے کرنسی نوٹوں کے اجراء اور پرانے ڈیزائن کے بینک نوٹوں کو ختم کرنے سے مرکزی بینکوں کو جعل سازی کو روکنے اور گردش میں بینک نوٹوں کی سالمیت کو یقینی بنانے میں مدد ملتی ہے۔
100,50,10اور 1000 روپے مالیت کے پرانے ڈیزائن کے نوٹ تبدیل کرانے کی تاریخ میں ایک سال کی توسیع کردی گئی ہے۔ پرانے ڈیزائن کے ان نوٹوں کو 31 دسمبر 2022ء تک پاکستان بھر میں قائم ایس بی پی – بی ایس سی کے دفاتر سے تبدیل کرایا جاسکتا ہے۔ تفصیلات اس لنک پردیکھیں۔ https://t.co/g8oJf1jOrU pic.twitter.com/Hv39akyMmd
— SBP (@StateBank_Pak) June 10, 2022
بیان میں مزید کہا گیا ہے کہ بینک نوٹوں کی نئی سیریز 2005 سے 2008 تک جاری کی گئی تھی اور پرانے ڈیزائن کے بینک نوٹوں کو آہستہ آہستہ گردش سے ہٹا دیا گیا ہے۔ اس لیے وفاقی حکومت نے 10، 50، 100 اور 1000 روپے کے پرانے ڈیزائن کے بینک نوٹوں کو ختم کرنے کا فیصلہ کیا ہے۔ یہ نوٹ یکم دسمبر 2016 سے قانونی ٹینڈر کے لیے ختم ہو گئے ہیں۔
10، 50، 100 اور 1000 روپے کے پرانے ڈیزائن کے کرنسی نوٹ اب 31 دسمبر 2022 تک کراچی، لاہور، پشاور، کوئٹہ، اسلام آباد، راولپنڈی، فیصل آباد، ملتان، گوجرانوالہ، حیدرآباد، سیالکوٹ، سکھر، بہاولپور، مظفر آباد اور ڈی آئی خان میں واقع مرکزی بینک کے دفاتر سے تبدیل کرائے جاسکتے ہیں۔
