قومی کرکٹ ٹیم کے وکٹ کیپر بلے باز محمد رضوان نے کپتان بابر اعظم کی خوبیوں سے متعلق نئے انکشافات کردیے۔
تفصیلات کے مطابق قومی ٹیم کے اوپننگ بلے باز محمد رضوان نے پریس کانفرنس میں بتایا کہ بابر اعظم عاجز اور بہترین انسان ہیں، کرکٹ کے علاوہ بھی ان میں بہت زیادہ خوبیاں ہیں۔
ویسٹ انڈیز کے خلاف سیریز کی تیاریوں کے حوالے سے انہوں نے کہا کہ ون ڈے میں ہمارا ٹاپ آرڈر شاندار پرفارمنس دے رہا ہے۔
محمد رضوان نے کہا کہ ٹاپ آرڈر کی شاندار پرفارمنس کی وجہ سے مڈل آرڈر کی پرفارمنس نظر انداز ہو رہی ہے۔
ان کا مزید کہنا تھا کہ جب یہ سوچیں گے کہ ہم پرفیکٹ ہیں، وہیں سے ہمارا زوال شروع ہو جائے گا۔ میں چاہتا ہوں ایک نہیں بلکہ پانچ پانچ وکٹ کیپرز ٹیم میں کھیلیں۔
محمد رضوان نے کہا کہ پاکستان کے بولرز سب سے بہتر ہیں، کاؤنٹی میں بھی پاکستانی بولرز کے خوب چرچے تھے۔ ہماری ٹیم کا بولنگ اسٹینڈرڈ کافی اوپر ہے۔
