جنوبی افریقا کے سابق جارحانہ بیٹر اے بی ڈیویلیئرز نے ٹی ٹوئنٹی ورلڈ کپ میں پاکستان اور بھارت کے فائنل میچ میں ہونے کے امکان کے نتائج جاری کردیے۔
گزشتہ روز اے بی ڈیویلیئرز نے پاکستان اور بھارت کے درمیان فائنل ہونے سے متعلق ٹوئٹر پر صارفین سے ’ہاں‘ اور ’نہیں‘ کے بارے میں پوچھا تھا۔
اے بی ڈیویلیئرز کے پوچھے گئے سوال پر 6 لاکھ 79 ہزار 573 لوگوں نے ووٹ دیے۔
سابق جنوبی افریقی بیٹر کے سوال پر دیے گئے ووٹوں کے نتائج کے مطابق 77.3 فیصد لوگوں نے ہاں جبکہ 22.7 نے نہیں کا انتخاب کیا۔
اے بی ڈیویلیئرز نے اپنے پیغام کے ساتھ لکھا کہ میرا ووٹ بھی پاک بھارت فائنل کے لیے ہے۔
انہوں نے مزید لکھا کہ نیوزی لینڈ اور انگلینڈ کے پاس بھی بہترین کھلاڑی ہیں اور دونوں ٹیمیں اچھی فارم میں ہیں، ورلڈ کپ کے دونوں سیمی فائنل بہترین ہوں گے۔
Pakistan/India final?
— AB de Villiers (@ABdeVilliers17) November 7, 2022
واضح رہے کہ پاکستان اور نیوزی لینڈ کے درمیان کل پہلا سیمی فائنل سڈنی جبکہ بھارت اور انگلینڈ کا سیمی فائنل جمعرات کو ایڈیلیڈ میں شیڈول ہے۔
ٹی ٹوئنٹی ورلڈ کپ کا فائنل اتوار کو میلبرن میں کھیلا جائے گا۔
