متحدہ عرب امارات میں جاری ایشیا کپ ٹی 20ٹورنامنٹ کے گروپ اے میں شامل پاکستان اور ہانگ کانگ کی ٹیمیں آج شارجہ میں مدمقابل ہوں گی، جیتنے والی ٹیم سپر فور میں داخل ہو گی جبکہ ہارنے والی ٹیم ٹورنامنٹ سے باہر ہو جائے گی ۔
تفصیلات کے مطابق پاکستان اور ہانگ کانگ دونوں کو گروپ میچ میں بھارت کے ہاتھوں شکست ہو چکی ہے جس کے بعد آج کا میچ ناک آؤٹ ہوگا، پاکستان اور ہانگ کا میچ پاکستانی وقت کے مطابق شام 7 بجے شروع ہوگا۔
واضح رہے کہ ایشیا کپ میں 6 بہترین ٹیموں کو 2 گروپس میں تقسیم کیا گیا، پاکستان گروپ اے میں بھارت اور ہانگ کانگ کے ساتھ جبکہ گروپ بی میں سری لنکا ،افغانستان اور بنگلادیش کی ٹیمیں شامل ہیں،دونوں گروپ کی ٹاپ دو ٹیمیں سپر فور مرحلے کیلئے کوالیفائی کریں گی جس کا آغاز 3 ستمبر سے ہوگا۔
بھارت گروپ اے سے جبکہ افغانستان اور سری لنکا گروپ بی سے پہلے ہی سپر فور مرحلے میں پہنچ چکا ہے،سپر فور کی چوتھی ٹیم کا فیصلہ آج پاکستان اور ہانگ کانگ کے ناک آؤٹ میچ کے بعد ہوجائے گا،سپر فور کی ٹاپ ٹو ٹیموں کے درمیان فائنل 11 ستمبر کو کھیلا جائے گا۔
