پی سی بی کا پاکستان جونیئر لیگ کے افتتاحی میچ کے دوران تہوار جیسا ماحول پیدا کرنے کا ارادہ ہے۔
تفصیلات کے مطابق پاکستان جونیئر لیگ کو کرکٹ کی مزید پروقار تقریب بنانے کے لیے میوزیکل اور فوڈ بیسڈ مواد رکھا جائے گا جبکہ مشہور شخصیات ٹورنامنٹ کو بڑے پیمانے ہر عوام میں مقبول بنانے کے لیے انفرادی طورپر ٹیموں کی مدد کریں گے۔
پلیئر ڈرافٹ سے 6 ٹیموں کا انتخاب کیا جائے گا جس کے ہر اسکواڈ میں 15 کھلاڑی شامل ہوں گے جبکہ پی سی بی 24 غیر ملکی کھلاڑیوں کوبھی ٹورنامنٹ میں مدعو کرے گا۔
ذرائع کے مطابق پاکستان جونیئر لیگ میں شامل ٹیموں کے نام ان شہروں کے ناموں پر رکھے جائیں گے جو پی ایس ایل کا حصہ نہیں ہیں۔
واضح رہے کہ جاوید میانداد، شاہد آفریدی، شعیب ملک اور ڈیرن سیمی کو پہلے ہی مینٹور کے طور پر لیگ میں مقرر کیا جا چکا ہے جبکہ مزید نامور کرکٹرز بھی لیگ سے منسلک ہوں گے۔
پاکستان جونیئر لیگ پی سی بی چیئرمین رمیز راجہ کا ڈریم پراجیکٹ ہے جس کے لیے ایک کروڑ روپے سے زائد کی رقم صرف مینٹورز کو دی جا رہی ہے تاہم اگر رمیز اپنے عہدے پر برقرار نہ رہ سکے تو پراجیکٹ بھی بند ہونے کا امکان ہے۔
