پاکستان شوبز انڈسٹری کی معروف اداکارہنمرہ خان نے اپنی ناکام شادی سے متعلق اہم انکشاف کیا ہے۔
نمرہ خان نے نجی ٹی وی کے ایک پروگرام میں گفتگو کرتے ہوئے بتایا کہ میری طلاق نہیں ہوئی تھی بلکہ میں نے خود خلع لی تھی۔
انہوں نے کہا کہ پہلے میں سوچتی تھی اس بارے میں بات نہ کروں اور جتنا ہو سکے یہ سب ڈھکا چھپا رہے مگر ہم فنکاروں کی زندگی کی ہر بات سب کو معلوم ہوتی ہے اس لئے میں اس پر بھی کھل کر بات کرتی ہوں۔
دوران پروگرام اداکارہ آبدیدہ بھی ہو گئیں، اداکارہ نے کہا کہ میں نے بہت سخت اور بہت بُرا وقت دیکھا ہے میں سب کو نہیں بتا سکتی کہ میرے ساتھ کیا ہوا ،آج کیا ہوا ڈیڑھ ماہ بعد کیا ہوا کیونکہ ہمارے لوگ ہمارا ہنستا ہوا چہرہ دیکھنا پسند کرتے ہیں، لوگ روتا ہوا چہرہ قبول نہیں کرتے اور کسی کو اپنی کمزوری نہیں دینی چاہئیے ورنہ لوگ فائدہ اُٹھاتے ہیں۔
نمرہ خان نے نور مقدم کا حوالہ دیتے ہوئے کہا کہ اگر لڑکیاں ہمت نہ کریں اور والدین ان کو سپورٹ نہ کریں تو نور مقدم کی طرح قتل کر دی جاتی ہیں کیونکہ کوئی گولی مار دیتا ہے تو کوئی کسی اور طرح سے بیوی کی جان لے لیتا ہے۔
انہوں نے لڑکیوں کو مشورہ دیتے ہوئے کہا کہ جن لڑکیوں کو شادی کے بعد شوہر کی جانب سے تشدد کا نشانہ بنایا جاتا ہے انہیں چاہئیے بس اتنا ہی برداشت کریں جتنا وہ کر سکتی ہیں اور جب انکی برداشت ختم ہو جائے تو فوری ایکشن لیں اور اپنے والدین کو اس بارے میں آگاہ کریں۔
اداکارہ کا کہنا تھا کہ والدین کو بھی چاہئیے وہ بیٹیوں کو سپورٹ کریں اور اگر ان کے ساتھ کچھ بھی غلط ہو رہا ہو تو بیٹیوں کا ساتھ دیں اور اگر وہ خلع لے کر الگ ہونا چاہیں تو اس میں بھی ان کا ساتھ دیں۔
واضح رہے کہ اداکارہ نے 19 اپریل 2020 کو لندن کے پولیس افسر سے شادی کی تھی تاہم ان کی شادی زیادہ دن نہ چل سکی اور اگست 2021 میں ان کے شوہر نے بتایا کہ وہ دونوں علیحدہ ہو چکے ہیں۔
