سول ایوی ایشن اتھارٹی نے کہا ہے کہ پاکستان کے لیے سفر کرنے سے 72 گھنٹے قبل کورونا ٹیسٹ لازمی ہے۔
سی اے اے نے بیرون ملک سے پاکستان آنے والے مسافروں کے لیے نیا سفری ہدایت نامہ جاری کیا اور کہا کہ نئی سفری ہدایات پر آج رات 12 بجے سے عمل درآمد شروع ہو گا۔
جاری کردہ ہدایت نامے کے مطابق کورونا کی مکمل ویکسینیشن والے مسافروں کو پاکستان سفر کرنے کی اجازت ہو گی۔
ادارے نے بیرون ملک سے پاکستان آنے والے مسافروں کے ریپڈ انٹیجن ٹیسٹ کی شرط بر قرار رکھنے کا فیصلہ کیا ہے۔
ہدایت نامے میں کہا گیا کہ سی کیٹگری اور ہائی رسک کیٹگری میں شامل ملکوں سے پاکستان آنے والے مثبت کورونا والے مسافروں کو محکمہ صحت کے سینٹرز پر 10 روز قرنطینہ کرنا ہو گا۔ قرنطینہ کیے گئے مسافروں کا آٹھویں روز دوبارہ ٹیسٹ ہوگا اور منفی رپورٹ پر گھر جانے کی اجازت ہو گی۔
سی اے اے کا کہنا ہے کہ کیٹگری بی اور ہائی رسک والے ملکوں سے مسافروں کو پاکستان سفر کی اجازت ہو گی۔
ادارے کے مطابق کیٹگری سی ممالک فہرست میں تھائی لینڈ، عراق، بلغاریہ، میکسیکو، یوکرین سمیت 10 ملکوں کو شامل کیا گیا ہے جبکہ ہائی رسک کیٹیگری میں روس، جرمنی، ایران، افغانستان، فلپائن اور ایتھوپیا شامل ہیں۔
