لاہور : پنجاب کے دارلحکومت لاہور کے ساتھ ساتھ دوسرے شہروں میں بھی اومیکرون پھیلنا شروع ہوگیا اور صوبے میں اومیکرون کے کیسز کی تعداد 402 ہو گئی۔
تفصیلات کے مطابق پنجاب میں اومیکرون کے کیسز کی تعداد میں اضافہ جاری ہے ، محکمہ صحت پنجاب کی جانب سے بتایا گیا کہ 24 گھنٹوں کے دوران لاہور میں اومیکرون کے 43 نئے کیسز سامنے آگئے، جس کے بعد شہر میں اومیکرون کے کیسز کی تعداد 378 ہو گئی۔
محکمہ صحت کا کہنا تھا کہ اوکاڑہ میں اومیکرون کے 3 نئے کیسز ، منڈی بہاوالدین اور راولپنڈی میں بھی اومیکرون کا ایک ایک کیس سامنے آیا، جس کے بعد صوبے میں اومیکرون کے کیسز کی تعداد 402 ہو گئی۔
لاہور کے ساتھ ساتھ دوسرے شہروں میں بھی اومیکرون کے کیسز میں اضافہ ہونا شروع ہوگیا ہے ، محکمہ صحت کا کہنا ہے کہ کورونا کے نئے ویرینٹ کو روکنا ایک چیلنج بن چکا ہے۔
محکمہ صحت پنجاب کے مطابق لاہور میں کورونا وائرس کے مثبت کیسز کی شرح بھی 7 فیصد تک پہنچ گئی ہے۔
خیال رہے ملک بھر میں کورونا ٹیسٹ مثبت آنے کی شرح سات فیصد سے زائد ہوگئی، چوبیس گھنٹوں کے دوران ساڑھے تین ہزار سے زائد کیسز رپورٹ ئوئے اور مزید سات مریض انتقال کر گئے۔
