لاہور: ساتویں میگا لیدر شو کے انعقاد کا اعلان ہوگیا۔ پاکستان فٹ ویئر مینوفیکچررز ایسوسی ایشن،پاکستان ٹینرز ایسوسی ایشن، پاکستان گلوز مینوفیکچررز اینڈ ایکسپورٹرز اور پاکستان لیدر گارمنٹس مینوفیکچررز اینڈ ایکسپورٹرز پارٹنر ہوں گے ۔
تفصیلات کے مطابق لاہور ایکسپو میں 28 سے 30 جنوری تک انتظامیہ نے لیدر شو 2022 کے انعقاد کا اعلان کیا ہے۔
نمائش کا افتتاح وزیر اعظم کے مشیر تجارت عبدالرزاق داؤدکر یں گے افتتاحی تقریب میں غیر ملکی سفارت کار اور یورپی یونین کے مندوبین بھی شریک ہو ں گے۔
یاد رہے، پاکستان میں گائے، بھینس، بھیڑ اور بکری کی کھالوں کا تیار شدہ چمڑہ زیادہ ویلیو ایڈڈ پروڈکٹ ہے جو دنیا میں وافر مقدار میں برآمد کیا جارہا ہے۔
نمائش میں چمڑے کے جوتے بنانے والی صنعت اور چمڑے کے سامان کی طرف سے تیار کی جانے والی اعلی معیار کی مصنوعات کی خصوصی نمائش بھی رکھی جائیں گی۔
نمائش میں اٹلی، جرمنی، تھائی لینڈ، سپین، فرانس، ترکی اور ہالینڈ سے خریدار آئیں گے۔ واضح رہے کہ نمائش یورپ کی مارکیٹ کو سامنے رکھتے ہوئے ترتیب دی گئی ہے۔
توقع کی جارہی ہے کہ یہ نمائش لیدر کی مارکیٹ میں پاکستان کو ایک بہتر مقام دلوانے میں معاون ثابت ہوگی۔
