پاکستان کے نامور یوٹیوبر اور اداکار ارسلان نصیر نے پاکستان میں پیٹرول کی قیمت میں 12 روپے کے بڑے اضافے پر مضحکہ انداز میں غصے کا اظہار کیا ہے۔
عوام سمیت پیٹرول کی قیمتوں پر پاکستانی اداکار اور نامور شخصیات بھی حیران و پریشان ہیں، ساتھ ہی پیٹرول کی قیمتوں کا ہیش ٹیگ ٹوئٹر پر ٹاپ ٹرینڈ میں شامل ہے، مہنگائی سے ستائی عوام اپنا غم و غصہ اور بھڑاس سوشل میڈیا پر نکال رہی ہے۔
یوٹیوبر ارسلان نصیر نے ٹوئٹر پر جاری پیغام میں سوال کیا کہ آپ کے خیال میں پاکستانی حکومت نے ترک سیریز ارطغرل غازی کیوں نشر کی؟
ساتھ ہی انہوں نے لکھا کہ ارطغرل ڈرامہ اسی لیے دکھایا جا رہا تھا تاکہ عوام گاڑیاں چھوڑ کر گھوڑوں پر سفر کرے۔
Nahi to aap ke khayaal mai Ertugrul kyun dikhaya ja raha tha? Issi liye taakay awaam gaari ki bajaye ghorro pe safar karay 👌 #petrolprice
— Arsalan Naseer (@ArslanNaseerCBA) February 16, 2022
واضح رہے کہ گزشتہ روز ہی وفاقی حکومت نے پیٹرولیم مصنوعات کی قیمت میں بڑا اضافہ کیا ہے۔
وزارت خزانہ کی جانب سے جاری نوٹیفکیشن کے مطابق 12 روپے 3 پیسے فی لیٹر اضافے کے بعد پیٹرول کی نئی قیمت 159 روپے 86 پیسے ہوگئی ہے۔
اس کے علاوہ ڈیزل کی قیمت میں بھی 9 روپے 53 پیسے فی لیٹر کا اضافہ کیا گیا ہے جس کے بعد ڈیزل کی نئی قیمت 154 روپے 15 پیسے ہو گئی ہے۔
