بالی ووڈ کے دبنگ اداکار سلمان خان کے والد سلیم خان نے کترینہ کیف اور وکی کوشل کی شادی کی خبروں کو افواہ قرار دے دیا۔
بھارتی میڈیا میں ان دنوں بالی ووڈ کی باربی ڈول کترینہ کیف کی اداکار وکی کوشل سے شادی کی خبریں گردش کررہی ہیں اور آئے دن اداکارہ کی شادی کے حوالے سے نیا بیان یا دعویٰ سامنے آجاتا ہے، اب سلمان خان کے والد سلیم خان نے ان تمام خبروں کو افواہ قرار دے دیا۔
بالی ووڈ کی کامیاب ترین فلم شعلے سمیت متعدد بلاگ بسٹر فلمیں لکھنے والے نامور لکھاری سلیم خان سے جب کترینہ کیف اور وکی کوشل کی شادی سے متعلق پوچھا گیا تو انہوں نے جواب دیا ’’اگر ان کی شادی واقعی ہورہی ہے تو اس پر میں کیا کہہ سکتا ہوں، میڈیا کے پاس تو اس قسم کے خبروں کے علاوہ اور کچھ بچا ہی نہیں ہے۔
خیال رہے گزشتہ کئی روز سے بالی ووڈ میں کترینہ کیف کی فلم انڈسٹری چھوڑنے اور نام تبدیل کرنے سمیت متعدد افواہیں گردش کررہی ہیں جس میں کہا گیا کہ کترینہ نے سسرالیوں کو وقت دینے کے لیے بالی ووڈ سے رخصت لے لی ہے۔
اس سے قبل بھارتی میڈیا نے یہ رپورٹ کیا تھا کہ اداکارہ کترینہ کیف اور اداکار وکی کوشل کی شادی دسمبر میں ہوگی جس کے لیے انہوں نے تیاریاں مکمل کرلی ہیں اور پہلے وہ کورٹ میرج کریں گے جس کے بعد ولیمہ کا بندوبست راجھستان کے ایک ہوٹل میں کیا گیا ہے۔
بالی ووڈ کے سلطان سلمان خان سے متعلق بھی یہ خبر سامنے آئی تھی کہ وہ اپنے مصروف ترین شیڈول کے باعث کترینہ کیف کی شادی میں شرکت نہیں کریں گے۔
