اسرائیل میں کورونا وائرس کے نئے ویرینٹ کا انکشاف، دو افراد میں نئے ویرینٹ کی تشخیص ہوگئی۔
غیر ملکی میڈیا رپورٹ کے مطابق اسرائیل میں کورونا وائرس کا نیا ویرینٹ سامنے آگیا اسرائیل میں فلائٹ کے ذریعے آنے والے دو افراد میں اس نئے ویرینٹ کی تشخیص ہوئی ہے تاہم، اس نئے وائرس کا تاحال کوئی نام نہیں رکھا گیا ہے۔
غیر ملکی میڈیا رپورٹ میں کہا گیا ہے کہ یہ نیا وائرس 2021ء میں کورونا وائرس کے جنوبی افریقا سے پھیلنے والے ویرینٹ، ’اومیکرون‘ کے دو سب ویرینٹ ’بی اے.1‘ اور ’بی اے.2‘ کا مجموعہ ہے۔
اس حوالے سے اسرائیلی محکمہ صحت کے ڈائریکٹر جنرل نچمن ایش کا کہنا ہے کہ فی الحال اس وائرس کے مقام کا پتہ لگانا مشکل ہے مگر ممکن ہے کہ یہ نیا ویرینٹ اسرائیل ہی میں وجود میں آیا ہو۔
انہوں نے خدشہ ظاہر کیا کہ ہو سکتا ہے کہ متاثر ہونے والے دونوں افراد بیرون ملک سفر کرنے سے قبل ہی اس وائرس کا شکار ہوئے ہوں۔
اسرائیل کے محکمہ صحت کے مطابق اس نئے وائرس کا شکار ہونے والے دونوں مریضوں میں ہلکے بخار، سر درد اور پٹھوں کھچاؤ اور درد کی علامات سامنے آئی ہیں۔
اسرائیل کے محکمہ صحت کا کہنا ہے کہ نئے ویرینٹ سے متاثرہ مریضوں کو طبی امداد کی کوئی خاص ضرورت نہیں ہے۔
