لاہور: آسٹریلیا کرکٹ ٹیم کے کوچ اینڈریو میکڈانلڈ کا کہنا ہے کہ ہمارا پاکستان میں تجربہ شاندار رہا یہ ایک تاریخی دورہ ہے جو ایک عرصہ کے بعد ہوا ہے۔
آسٹریلیا کرکٹ ٹیم کے کوچ اینڈریو میکڈانلڈ نے آن لائن پریس کانفرنس کرتے ہوئے کہا کہ پاکستان میں بہت اچھی کرکٹ ہوئی، پاکستان کی میزبانی شاندار رہی کرکٹ کا معیار غیر معمولی رہا ہے ہمیں یہ رودہ ہمیشہ یاد رہے گا۔
آسٹریلوی کوچ نے پاکستانی کپتان کی تعریف میں کہا کہ بابر اعظم نے ون ڈے سیریز شاندار کھیلی ہے جبکہ پاکستانی کرکٹرز نے عمدہ مقابلہ کیا ہے اور پاکستان کے ایمرجنگ کھلاڑی بھی اچھا کھیل رہے ہیں۔
آسٹریلوی کوچ کا کہنا تھا کہ میرے لیے یہاں کوچنگ کا تجربہ بھی شانداررہا اور میں بہت لطف اندوز ہوا ہوں۔
اینڈریو میکڈانلڈ کا کہنا تھا کہ اس ون ڈے سیریز میں کئی کھلاڑیوں کو موقع ملا، ہم نے بہترین ون ڈے سائیڈ میدان میں اتارنے کی کوشش کی، ہم تینوں ٹاس ہارے ہیں ، لیکن پہلا میچ جیتے جبکہ دوسرا میچ جیتنے کا ہمارے پاس موقع تھا۔
انہوں نے کہا کہ ٹریوس ہیڈ نے ذمہ داری لی جس کا فائدہ ہوا جبکہ آسٹریلیا کرکٹ ٹیم کے ساتھ میری ابھی تفصیلی بات نہیں ہوئی ، مستقبل میں میری جاب کا کیا ہوتا ہے اس کا بھی ابھی علم نہیں ہے۔
انہوں نے کہا کہ ایرن فنچ بھی اپنی حالیہ فارم کی وجہ سے مایوس ہے ، وہ ویسا نہیں کھیل پا رہے جیسے ان سے امید ہوتی ہے، ایرن فنچ کے ساتھ کام ہو رہا ہے جہاں ان کو مشکل پیش آرہی ہے وہ بہتری کے لئے کام کررہے ہیں۔
