ٹویٹر نے پہلے مخصوص گروہ یا قریبی دوستوں کو منتخب ٹویٹس بھیجنے کا فیچر فلیٹ پیش کیا جو کسی وجہ سے بند کردیا گیا تھا۔ اب ٹویٹر نے ویسےہی ایک اور آپشن کی آزمائش شروع کردی ہے جسے فلوک یا جُھنڈ کا نام دیا گیا ہے۔
اس طرح آپ منتخب رابطوں، قریبی دوست، کاروباری حلقوں کو منتخب کرکے مخصوص ٹویٹس بھیج سکیں گے۔ اسے عین کمیونٹی آپشن بھی قرار دیا جاسکتا ہے۔ تاہم بعض صارفین کو یہ آپشن حاصل ہوچکا ہے۔ اس کی بدولت آپ کی ٹویٹس عوامی ہونے کی بجائے پرائیوٹ بھیجی جاسکتی ہیں۔
اس کے لیے فلاک آپشن دبانا ہوگا اور اس میں اپنے پسندیدہ افراد کو شامل کرنا ہوگا اور اسے کوئی عنوان دینا ہوگا۔ اس طرح جب جب آپ ٹویٹ کرکے اس نام کے مجموعے پر کلک کریں گے تو تمام کانٹیکٹس تک ٹویٹس پہنچ جائے گی۔ یہ کاروباری اداروں اور دیگر گروہوں کے لیے ایک مفید آپشن ہوسکتا ہے۔
ایک فلاک میں ایک وقت میں 150 افراد کو شامل کیا جاسکتا ہے۔ اس کے مختلف پوسٹنگ آپشن بھی شامل ہوں گے۔ اس طرح یہ پرائیوٹ ٹویٹ خاص علامت کے ساتھ ہرمنتخب شخص تک پہنچ جائے گا۔
تجزیہ کاروں کے مطابق یہ ٹویٹر ریپلائی کنٹرول آپشن جیسا ہے جسے 2020 میں پیش کیا گیا تھا۔
