بالی ووڈ اداکارہ پریانکا چوپڑا نے اپنے سوشل میڈیا اکاؤنٹس پر اپنے نام سے شوہر نک جونس کا نام ہٹانے کی وجہ بتادی۔
اداکارہ نے ٹائمز آف انڈیا کو انٹرویو دیتے ہوئے بتایا کہ انہوں نے جونس کو اپنے سوشل میڈیا ہینڈلز سے صرف اس لئے ہٹایا ہے کیونکہ وہ ٹوئٹر اور انسٹاگرام دونوں پر ایک ہی نام رکھنا چاہتی ہیں۔
انہوں نے کہا کہ ان کی ایک چھوٹی سی تفریح کس طرح لوگوں کے لئے ایک بڑا مسئلہ بن گئی۔
واضح رہے کہ پریانکا چوپڑا کی ہالی ووڈ فلم دی میٹرکس آج سینما کی زینت بنے گی جس میں پریانکا ستی کا کردار ادا کررہی ہیں۔
دوسری جانب پرینکا کی والدہ مدھو نے ہے میٹرکس 4 کے پریمیئر سے پرینکا کے ساتھ اپنی ایک تصویر شیئر کرتے ہوئے کہا کہ انہیں اپنی بیٹی پر فخر ہے۔
اس تصویر میں پریانکا چوپڑا کی والدہ نے انہیں گلے سے لگایا ہوا ہے اور بہت خوش نظر آرہی ہیں۔
انہوں نےبیٹی کو فلم کی ریلیز پر مبارکباد دیتے ہوئے لکھا کہ ’وہ اس لگن پر بہت خوش ہیں جو کہ پریانکا نے اس کامیابی کے راستے پر دکھائی ہے‘۔
مدھو چوپڑا نے بیٹی کو فلم’دی میٹرکس ریسریکشنز‘ کی ریلیز پر مبارکباد دی اور اداکارہ کے مستقبل کے لیے اپنی نیک خواہشات کا اظہار بھی کیا۔
واضح رہے کہ بالی ووڈ اداکارہ پریانکا چوپڑا نے اپنے اداکاری کے کیریئر کے آغاز سے پہلے ایک ماڈل کے طور پر کام کیا تھا۔
انہوں نے اپنی اداکاری کا آغاز 2002 کی تامل فلم سے کیا تھا اور اس کے بعد بھارت کی متعدد فلموں میں بھی اپنی اداکاری کے جلوے بکھیرنے میں کامیاب رہیں۔
اداکارہ نے 2000 میں مس ورلڈ کا ٹائٹل جیتنے کے بعد شہرت حاصل کی۔
یاد رہے کہ پریانکا چوپڑا اور امریکی گلوکار نک جونس نے دسمبر 2018 میں شادی کی تھی اور ان کی شادی ہندو رسم ورواج اور عیسائی عقیدے کے مطابق ہوئی تھی جس کے بعد انہوں نے انسٹاگرام پر اپنا نام تبدیل کر لیا تھا۔
