مائیکرو سافٹ کے بانی بل گیٹس نے کورونا کی وباء کے خاتمے کے حوالے سے ایک اور پیشکوئی کی ہے۔
بل گیٹس نے ایک بلاگ میں واضح کیا ہے کہ میرے اندازے کے مطابق کورونا کی وباء سال 2022 کے دوران کسی بھی وقت ختم ہوجائیگی۔
انہوں نے اپنے بلاگ میں لکھا ہے کہ سال 2021 میں اس وباء کے خاتمے کے امکانات موجود تھے لیکن لوگوں کی ویکسینیشن کے عمل میں سستی اور اس کی مختلف اقسام نے اس امید کو توڑ دیا ہے۔
بل گیٹس نے واضح کیا ہے کہ کورونا وباء کی نئی قسم اومیکرون بلاشبہ ایک خطرناک قسم ثابت ہورہی ہے لیکن ویکسینز کی موجودگی اور اینٹی وائرل ادویات کے استعمال میں تیزی اس وائرس کو جلد ختم کرنے میں مدد فراہم کریگی۔
انہوں نے کہا ہے کہ اومیکرون کی اس لہر سے بہتر انداز سے نمٹنے کے لئے پوری دنیا تیار ہے اور ویکسینز کو اپ ڈیٹڈ طور پر پیش کرنے کے لئے بھی کام جاری ہے۔
انہوں نے بتایا ہے کہ اینٹی وائرل ادویات کا استعمال اور ویکسینیشن کے عمل کے بعد کورونا ایک جان لیوا مرض نہیں رہیگا بلکہ اس کی نوعیت میں بہت حد تک کمی واقع ہوجائیگی۔
خیال رہے کہ بل گیٹس کی جانب سے کورونا وباء کے خاتمے کے حوالے سے متعدد بار یہ پیشگوئی کی جاچکی ہے۔
جس میں بتایا گیا تھا کہ اس وبائی صورتحال اور لاک ڈاؤن سے مکمل نجات سال 2022 کے اختتام پر مل جائیگی اور دنیا ایک بار پھر سے سال 2019 کے معمولات زندگی گزارنے لگے گی۔
