امریکی ویکسین موڈرنا کے بچوں پر کئے گئے ویکسین ٹرائل کے نتائج سامنے آگئے ہیں۔
کمپنی کے مطابق اس کی تیار کردہ ایم آر این اے ویکسین چھ سے گیارہ سال کی عمر کے بچوں میں ٹھوس مدافعتی ردعمل کو متحرک کرتی ہے جس کی سطح تقریبا نوجوانوں اور بالغ افراد میں بننے والے مدافعتی ردعمل کے برابر ہے۔
یہ ٹرائل کے دوسرے اور تیسرے مرحلے کے ابتدائی نتائج ہیں، اس ٹرائل میں 4573 صحت مند بچوں کو شامل کیا گیا تھا جن میں سے ویکسین اور پلیسبو استعمال کرنے والے گروپس کو بنایا گیا۔
جن سے ثابت ہوتا ہے کہ ویکسین بچوں کو استعمال کرانے کے لیے محفوظ ہے۔ویکسین گروپ میں شامل بچوں کو 50 مائیکرو گرام کی دو خوراکیں 28 دن کے وقفے سے استعمال کرائی گئی تھیں، نتائج سے ثابت ہوا کہ دوسری خوراک کے استعمال کے ایک ماہ بعد بچوں میں ٹھوس مدافعتی ردعمل بن گیا.
موڈرنا ویکسین ٹرائل میں جو مضر اثرات بچوں میں نظر آئے وہ معمولی یا معتدل تھے جن میں تھکاوٹ، سردرد، بخار اور انجیکشن کے مقام پر تکلیف قابل ذکر ہے۔
اب کمپنی کی جانب سے یہ ڈیٹا دنیا بھر میں ریگولیٹری اداروں کو پاس جمع کرانے کے بعد اس عمر کے بچوں کے لیے ویکسین استعمال کرنے کی اجازت طلب کی جائے گی۔
یہ نتائج اس وقت سامنے آئے ہیں جب 22 اکتوبر کو فائزر کی جانب سے 5 سے 11 سال کے بچوں میں ویکسین ٹرائل کے نتائج جاری کیے گئے تھے۔
تحقیق میں پانچ سے گیارہ سال کے بچوں میں ویکسین محفوظ اور بیماری سے بچانے کے لیے 90.7 فیصد تک مؤثر ثابت ہوئی۔
