آخر وہ دن آ ہی گیا جس کا سب کو انتظار تھا، ٹی 20 ورلڈ کپ کا سب سے بڑا مقابلہ آج ہو گا، دبئی کے میدان میں روایتی حریف پاکستان اور بھارت کی ٹیمیں مدمقابل ہوں گیں.
کرکٹ کا عالمی مقابلہ، ٹی 20 ورلڈکپ میں پاکستان اور بھارت کا آمنا سامنا آج ہونے جا رہا ہے، میدان انٹرنیشنل اسٹیڈیم دبئی میں سجے گا، رات سات بجے بگل بجے گا۔
دونوں روایتی حریفوں نے تیاریاں مکمل ، پلان فائنل کر لئے۔ چھکے چوکوں کی بہار میں وکٹیں بھی لگاتار گریں گی، کرکٹ دیوانے مقابلہ دیکھنے کو بے قرار ہیں۔ قومی کپتان بابر اعظم نے بارہ رکنی ٹیم کا اعلان کردیا، سب پر مان کرتے ہوئے کہا کہ کھلاڑی پرجوش ہیں۔
بھارت کیخلاف میچ کیلئے قومی ٹیم کی قیادت بابراعظم کریں گے جبکہ دیگر کھلاڑیوں میں محمد رضوان، فخر زمان، حیدر علی، شعیب ملک، محمد حفیظ، آصف علی، شاداب خان، عماد وسیم، حسن علی، شاہین آفریدی اور حارث رؤف کو شامل کیا گیا۔
بھارتی کپتان ویرات کوہلی نے بھی بابرالیون کو مضبوط کمبی نیشن قرار دے دیا، کہتے ہیں کہ وہ بھی پوری تیاری کے ساتھ میدان میں اتریں گے۔ پاکستان اور بھارت کے درمیان 8 ٹی 20 میچ کھیلے گئے، پاکستان نے ایک جیتا، 6 میں گرین شرٹس کو شکست ہوئی۔
پاکستان کو بھارت کیخلاف ٹی ٹونٹی میچز میں واحد فتح بنگلور کے مقام پر دسمبر 2012 میں ملی تھی جب اس نے بھارت کو 5 وکٹوں سے زیر کیا۔
ورلڈ کپ مقابلوں میں روایتی حریف 5 مرتبہ آمنے سامنے آئے، دونوں کے درمیان پہلا ٹی ٹونٹی معرکہ 2007 کا ٹی ٹونٹی ورلڈ کپ تھا۔
دونوں ٹیموں نے مقررہ 20اوورز میں 141 ،141 رنز بنائے جس کے بعد ٹائی بریکر کیلئے بول آؤٹ کا سہارا لیا گیا۔ وریندر سہواگ، ہربھجن سنگھ اور رابن اتھاپا نے وکٹوں کو ہٹ کیا جبکہ پاکستان کے یاسر عرفات، عمر گل اور شاہد آفریدی تینوں ہی کا نشانہ چوک گیا۔ 10 روز بعد دونوں ایک بار پھر 2007 ٹی ٹونٹی ورلڈ کپ کے فائنل میں مدمقابل آئے، پاکستان ہدف کے قریب آکر بھی فتح سے دور رہ گیا۔
دونوں ٹیمیں 2012 کے ٹی ٹونٹی ورلڈ کپ میں ایک بار پھر مدمقابل آئیں اور اس میچ میں بھارت نے 8 وکٹ سے کامیابی حاصل کی۔ 2012 میں ہی پاکستان کرکٹ ٹیم نے بھارت کا دورہ کیا ،2 میچز کی سیریز کا پہلا میچ بنگلور میں ہوا جس میں پاکستان ٹیم 5 وکٹ سے کامیاب ہوئی لیکن احمد آباد میں ہونے والے دوسرے ٹی ٹونٹی میچ میں بھارت نے پاکستان کو 11 رنز سے ہرایا۔
بنگلا دیش میں 2014 کے ٹی ٹونٹی ورلڈ کپ میں بھی پاکستان اور بھارت کا سامنا ہوا جس میں پاکستان نے بھارت کو جیت کیلئے 131 رنز کا ہدف دیا جو اس نے با آسانی3 وکٹوں کے نقصان پر 9 گیندوں قبل حاصل کرلیا۔
2016 میں پاکستان اور بھارت کی ٹیمیں ایشیا کپ کے میچ میں ڈھاکا میں مدمقابل آئیں۔ پاکستان ٹیم 83 پر آؤٹ ہوگئی ،محمد عامر نے بھارت کو پریشان کیا مگر کم رنز کا ہدف بھارتی ٹیم نے 5 وکٹوں کے نقصان پر حاصل کرلیا۔
2016کے ٹی ٹونٹی ورلڈ کپ میں بھی بھارت کا پاکستان پر پلہ بھاری رہا اور کلکتہ کے ایڈین گارڈنز پر ہوم ٹیم 6 وکٹ سے فتحیاب رہی۔
پاک بھارت ٹی ٹونٹی میچز میں بیٹسمینوں کی کارکردگی دیکھی جائے تو کوہلی 6 میچز میں 254 رنز بناکر کامیاب بیٹسمین ہیں جبکہ شعیب ملک 164 رنز بناکر دوسرے اور محمد حفیظ 156 رنز بناکر تیسرے نمبر پر ہیں۔ عمر گل 11 وکٹوں کے ساتھ کامیاب ترین باؤلر ہیں، عرفان پٹھان نے پاک بھارت میچز میں 6 جبکہ محمد آصف نے 5 وکٹیں حاصل کیں۔
پاکستان اور بھارت کے درمیان میچز میں اعداد و شمار تو پاکستان کے حق میں نہیں لیکن اس ہائی وولٹیج میچ میں اعداد و شمار سے زیادہ عزم اور حوصلہ معنی رکھتا ہے اور فینز پُر امید ہیں کہ اس بار پاکستان ٹیم بہترین کھیل پیش کرکے تمام اعداد و شمار کو رد کرے گی اور کامیابی اپنے نام کرلے گی۔
