شادی کے باعث آسٹریلوی کرکٹر گلین میکسویل کا دورہ پاکستان سے باہر ہونے کا خدشہ ہے۔
کرک انفو کے مطابق آسٹریلوی آل راؤنڈر گلین میکسویل شادی کی وجہ سے آئی پی ایل کے ابتدائی میچز اور دورہ پاکستان سے باہر ہوسکتے ہیں۔
گلین میکسویل کا فاکس کرکٹ کو انٹریو دیتے ہوئے کہنا تھا کہ کرکٹ آسٹریلیا سے شادی اور شیڈول کو لے کر بات چل رہی تھی لیکن اچانک شیڈول میں تبدیلی کی وجہ سے میں سیریز میں شامل نہیں ہوسکوں گا۔
خیال رہے کہ میکسویل ابھی میلبورن میں ہی موجود ہیں جبکہ میڈیا رپورٹس کے مطابق گلین میکسویل اپنی بھارتی منگیتر ونی رمن سے 27 مارچ کو شادی کرسکتے ہیں جبکہ ان کی شادی کو لے کر سوشل میڈیا پر بھی کافی چرچا چل رہی ہے۔
کچھ دنوں قبل میکسویل اور رمن کی شادی کا کارڈ سوشل میڈیا پر وائرل ہوا تھا، جو تمل زبان میں چھپا ہوا تھا۔
یاد رہے کہ دونوں نے 2020 میں منگنی کی تھی، میڈیا رپورٹس کے مطابق ونی کا تعلق تمل ناڈو سے ہونے کی وجہ سے شادی تمل روایات کے مطابق ہوسکتی ہے۔
خیال رہے کہ گلین میکسویل نے اپنے ٹی ٹوئنٹی کیریئر میں کل 323 اننگز میں 28 کی اوسط سے 7780 رنز اسکور کیے ہیں جس میں ان کی پانچ سنچریاں اور 45 نصف سنچریاں شامل ہیں۔
علاوہ ازیں انہوں نے آل راؤنڈر کی حیثیت سے آف اسپن کرواتے ہوئے 120 وکٹیں بھی اپنے نام کی ہیں۔
