کراچی کے مختلف علاقوں میں ہلکی اور تیز بارش کا سلسلہ جاری ہے اور کئی علاقوں کو بجلی کی فراہمی ایک مرتبہ پھر منقطع ہو گئی ہے۔
شام کے سائے ڈھلتے ہی شہر قائد کے مختلف علاقوں میں ہلکی اور تیز بارش کا سلسلہ شروع ہو گیا۔
گلشن اقبال اور گلستان جوہر کے مختلف علاقوں، شارع فیصل کے ساتھ ساتھ نارتھ کراچی میں بھی بارش ہوئی اور یہ سلسلہ وقفے وقفے سے جاری رہا۔
بارش کے بعد چند علاقوں کو بجلی کی فراہمی ایک مرتبہ پھر منقطع ہو گئی ہے اور گلشن اقبال اور پی سی ایچ ایس سمیت متعد علاقے پھر بجلی سے محروم ہو گئے ہیں۔
واضح رہے کہ کراچی میں آج دوپہر میں بھی مختلف علاقوں میں بارش ہوئی تھی جن میں کورنگی اور ڈیفنس کے علاقے قابل ذکر ہیں۔
واضح رہے کہ گزشتہ روز محکمہ موسمیات نے سندھ اور بلوچستان کے کئی علاقوں میں آج سے جمعہ تک گرج چمک کے ساتھ بارش کی پیش گوئی کی تھی۔
ایک بیان میں محکمہ موسمیات نے کہا تھا کہ 31 اگست سے 3 ستمبر تک تھرپارکر، عمرکوٹ، میرپور خاص، سانگھڑ، شہید بینظیر آباد، حیدرآباد، بدین، ٹھٹہ، کراچی، جامشورو، دادو، لاڑکانہ، سکھر، جیکب آباد، کوہلو، برخان، سبی، لورالائی، موسٰی خیل، ژوب، زیارت، کوئٹہ، پشین، مستونگ، نصیر آباد، قلات، خضدار، لسبیلہ اور آواران میں تیز ہواؤں اور گرج چمک کے ساتھ بارش کا امکان ہے۔
