ٹوکیو پیرالمپکس میں پاکستان کیلئے پہلا گولڈ میڈ ل حاصل کرنے والے حیدر علی کا وطن واپس پہنچنے پر شاندار استقبال کیا گیا۔
وزیر کھیل پنجاب رائے تیمور بھٹی بھی ایئرپورٹ پہنچے اور حیدر علی کا استقبال کیا۔
اس موقع پر حیدر علی نے کہا کہ پاکستان کے لیے گولڈ میڈل جیتنا اعزاز ہے، گولڈ میڈل جیتنا خواب تھا، گھر پر رہ کر پانچ سال تک خود ٹریننگ کی۔
انہوں نے کہا کہ وبا کے دوران میدان بند تھے لیکن خواب پورا کرنے کے لیے ٹریننگ جاری رکھی۔
دوسری جانب رائے تیمور بھٹی نے اپنے ٹوئٹ میں کہا کہ ’ٹوکیو پیرالمپکس گیمز میں گولڈ میڈل حاصل کرنے والے ایتھلیٹ حیدر علی کو لاہور ایئرپورٹ پر ویلکم کیا۔‘
ٹوکیو پیرا اولمپک گیمز میں گولڈ میڈل حاصل کرنے والے اتھلیٹ حیدر علی کو لاہور ائیرپورٹ پر ویلکم کیا۔ گیمز میں شرکت کرنے والی اتھلیٹ انیلا بیگ کو بھی خوش آمدید کہا۔قومی ہیروز کی پزیرائی کے لئے وزیر اعظم @ImranKhanPTI اور وزیر اعلی پنجاب @UsmanAKBuzdar کی خصوصی ہدایات ہیں۔ pic.twitter.com/w8ACLGNu6C
— Rai Taimoor Khan Bhatti (@RaiTaimoorB) September 5, 2021
انہوں نے کہا کہ ’گیمز میں شرکت کرنے والی ایتھلیٹ انیلا بیگ کو بھی خوش آمدید کہا، قومی ہیروز کی پزیرائی کے لیے وزیر اعظم عمران خان اور وزیر اعلی پنجاب عثمان بزدار نے خصوصی ہدایات دیں۔‘
یاد رہے کہ حیدر علی نے ٹوکیو پیرالمپکس میں ڈسکس تھرو مقابلوں میں گولڈ میڈل جیتا، حیدر علی پیرالمپکس میں گولڈ میڈل جیتنے والے پہلے پاکستانی ہیں۔
حیدر علی نے پیرالمپکس میں ایف 37 ڈسکس تھرو مقابلے میں 55 اعشاریہ دو چھ میٹر تھرو کی۔
حیدر علی کا تعلق گوجرانوالہ سے ہے ، حیدر علی کی دائیں ٹانگ پیدائشی طور پر بائیں ٹانگ سے دو انچ پتلی اور ایک انچ چھوٹی ہے ، اپنے اس نقص کے ساتھ بھی وہ پاکستان کا نام عالمی سطح پر روشن کرتے دکھائی دیتے ہیں۔
